ஓவியம், ஒளிப்படம், சினமா போன்ற காட்சிக்கலைகளிலும் இலக்கியம் மற்றும் ஊடகத் தளங்களிலும் உங்களது ஈடுபாடுகள் பற்றிச் சொல்ல முடியுமா?
சிறுவனாக இருந்த காலத்தில், ஓவியக் கலையில் மிகுந்த ஈடுபாடு கொண்டிருந்தேன். ஓரங்க நாடகம் உள்ளிட்ட நாடக முயற்சிகளிலும் ஈடுபட்டிருக்கிறேன். பாடசாலையின் மாணவர் மன்ற நிகழ்வுகளில் ஒரு பாடகராகவும் இருந்திருக்கிறேன். ஓவியராகவும் நடிகராகவும் பாடகராகவும் தான் எனது கலைப்பயணம் ஆரம்பித்திருக்கிறது.
எனது பதின்ம வயதுக் காலத்தில், ஓவியர் மாற்கு அவர்களின் தொடர்பு கிடைத்தது. ஓவியக்கலை சார்ந்து, மிக முக்கியமான வழிகாட்டியாக அவர் இருந்திருக்கிறார். தொடர்ந்து, பல்வேறு ஓவியர்களுடனான தொடர்புகள் கிடைத்திருக்கின்றன. ஓவிய ஈடுபாட்டின் தொடர்ச்சியாகவே எனது ஒளிப்பட ஈடுபாடு அமைந்திருக்கிறது. பொருளாதாரத் தடைகள் உள்ளிட்ட பல்வேறு நெருக்கடிகள் நிறைந்திருந்த போர்க்காலத்தில், ஒளிப்படக் கலைசார் செயற்பாடுகளைத் தீவிரமாக முன்னெடுத்திருக்கிறேன். போர்க்காலத்திலேயே, 350 பக்கங்கள் வரை கொண்ட ஒரு ஒளிப்பட நூலை வெளியிட்டேன். தமிழீழ விடுதலைப் புலிகள் இயக்கத்தின் நிழல் அரசு இயங்கிக்கொண்டிருந்த காலகட்டத்தில், போர்மேகங்கள் சூழ்ந்திருந்த கிளிநொச்சியில், 2006 ஆம் ஆண்டின் நடுப்பகுதியில் அது நடந்தது. 'வாழும் கணங்கள்- அமரதாஸ் ஒளிப்படங்கள் : Living Moments - Photographs of Amarathaas' என்ற பெயரில், தமிழிலும் ஆங்கிலத்திலும் அந்த ஒளிப்பட நூல் அமைந்திருந்தது. அந்த நூல் வெளியீட்டைத் தொடர்ந்து, 'வாழும் கணங்கள்' (Living Moments) என்ற பெயரில், கிளிநொச்சியில் எனது ஒளிப்படக் காட்சி நிகழ்த்தப்பட்டது.
போர்க்காலத்தில், வன்னிப்பகுதியில் வாழ்ந்த காலத்தில், கலைகள் சார்ந்தும் ஊடகவியல் சார்ந்தும் இயங்கிக்கொண்டிருந்தேன். தொலைக்காட்சி நிகழ்ச்சித் தயாரிப்புகளிலும் சினமா சார்ந்த முயற்சிகளிலும் விவரணப்பட முயற்சிகளிலும் ஈடுபட்டிருக்கிறேன்.பல்வேறு கவிதைகளை, சிறுகதைகளை, கட்டுரைகளை எழுதியிருக்கிறேன். அச்சுத் தாள்கள் மற்றும் அச்சு வசதிகள் அரிதாக இருந்த அக் காலத்தில், 'இயல்பினை அவாவுதல்' என்ற பெயரில், எனது கவிதைத் தொகுப்பினை வெளியிட்டிருக்கிறேன்.
காட்சிக் கலைகள் சார்ந்து அதிகமதிகம் இயங்கி வந்திருக்கிறேன். போர்க்கால வாழ்வியல் அனுபவங்கள், முறைசாராக் கல்வி முயற்சிகள், காலத்தின் தேவைகள் போன்ற காரணிகள், என்னைக் கலைஞராக மட்டுமல்லாமல் சுயாதீன ஊடகராகவும் பரிமாணம்கொள்ளச் செய்தன என்று நினைக்கிறேன்.
யுத்தச் சூழ்நிலைகளாலும் அலைச்சல் மிகுந்த வாழ்வின் நெருக்கடிகளாலும் ஓவியக்கலையில் திருப்திகரமாக ஈடுபட முடியாமற் போயிருந்தாலும், தேவைகள் நிமித்தம் ஓவிய முயற்சிகளில் அவ்வப்போது ஈடுபட்டிருக்கிறேன். இலக்கியம் உள்ளிட்ட கலை சார் முயற்சிகளில், இயன்றவரை ஈடுபட்டு வந்திருக்கிறேன். ஒளிப்பட ஊடகவியல் சார்ந்து, இறுதிப் போர்க்காலத்தில் தீவிரமாக இயங்க நேர்ந்திருக்கிறது. அந்தத் தீவிரத்தை, இப்போது நினைத்துப் பார்க்கும்போது கொஞ்சம் ஆச்சரியமாகவே இருக்கிறது. எனது சக்திக்கு மீறிய அளவில் அது நிகழ்ந்திருப்பதாக உணர்கிறேன்.
ஊடகவியல் மற்றும் கலைகள் சார்ந்த உங்களது தேடல்கள், பணிகள், அனுபவங்கள்
போன்றவை போர்க்காலத்தில் எப்படியிருந்தன?
ஊடகவியல் சார்ந்து, சுயமாகவும் பல்வேறு வழிமுறைகளிலும் கற்றுக்கொள்ள முடிந்திருக்கிறது. யாழ் பல்கலைக்கழக வளாகத்தில், 'யாழ் பல்கலைக்கழக புறநிலைப் படிப்புகள் அலகு' இயங்கிய காலத்தில், ஊடகவியல் சார்ந்த கற்கைநெறியில் முழுமையாக ஈடுபட்டிருக்கிறேன். அதைத் தொடர்ந்து, அங்கு 'உளவளத்துணை' மற்றும் 'ஒளிப்படக்கலை' சார்ந்த கற்கைநெறிகளிலும் ஈடுபட முடிந்திருக்கிறது. நீண்ட காலமாக, 'சாளரம்' என்னும் சஞ்சிகை சார்ந்து இயங்கியிருக்கிறேன். சில ஊடகங்களில், சுயாதீன அடிப்படைகளில் எனது பங்களிப்புகள் தொடர்ந்திருக்கின்றன. பல்வேறு அச்சு ஊடகங்களில் எழுதியிருக்கிறேன். அவற்றிலே பெரும்பாலானவை இலக்கிய வகைமைக்குள் வரக் கூடியவை. சஞ்சிகைகள் மற்றும் புத்தகங்கள் பலவற்றில் எனது ஒளிப்படங்கள் பலவும் பிரசுரிக்கப்பட்டுள்ளன. இறுதி யுத்தத்திற்கு முன்னரான 'சமாதான காலத்தில்', யாழ் பல்கலைக்கழக ஊடக வளங்கள் பயிற்சி நிலையம் இயங்கிய போது, அங்கு சினமா ரசனை சார்ந்த பயிற்சி வகுப்புகளை நடாத்தியிருக்கிறேன்.
விடுதலைப் புலிகள் கலை பண்பாட்டுக் கழகத்தின் முயற்சியில், 'மானுடத்தின் தமிழ்க் கூடல்' என்ற மகுடத்தின் கீழ், ஒரு மாநாடு யாழ்ப்பாணத்தில் நடாத்தப்பட்டது. அங்கு இடம்பெற்ற ஊடகவியல் அமர்வில், காட்சி ஊடகங்கள் குறித்துக் கட்டுரை வாசித்திருக்கிறேன். அதில், தென்னிலங்கையிலிருந்து அழைத்துவரப்பட்டிருந்த சிங்களக் கலைஞர்களும் சிங்கள ஊடகர்களும் கலந்துகொண்டனர். பின்னர், தென்னிலங்கைச் சிங்கள ஊடகர்களின் முயற்சியில், 'சிங்கள- தமிழ்க் கலைக்கூடல்' என்ற மகுடத்தின் கீழ் கொழும்பில் நடாத்தப்பட்ட மாநாட்டிலும் சினமா அமர்வில் கட்டுரை வாசித்தேன். கிளிநொச்சியில் 'ஊடக அறிவியற் கல்லூரி' இயங்கியபோது, அக் கல்லூரி சார்ந்த சில முன்னெடுப்புகளில் இணைந்து பணியாற்றியிருக்கிறேன். சினமா சார்ந்தும் ஒளிப்படக்கலை மற்றும் ஒளிப்பட ஊடகவியல் சார்ந்தும் வன்னியிலே பயிற்சிப்பட்டறைகளை நடாத்தியிருக்கிறேன். ஊடகவியலையும் ஏனைய கலைசார் விடயங்களையும் நடைமுறை அனுபவங்களின் வழியாகவோ சுயாதீனமாகவோ தான் அதிகமதிகம் கற்றுக்கொள்ள முடிந்திருக்கிறது.
இறுதி யுத்தகாலத்தில் மட்டும் பல்லாயிரக்கணக்கிலான ஒளிப்படங்களை எடுத்திருக்கிறேன். அந்தக் கொடிய காலத்தின் பல்வேறு மோசமான அனுபவங்களும் அலைக்கழிக்கப்பட்டுக்கொண்டிருந்த அப்பாவி மக்களின் அவலங்களைப் பதிவுசெய்து வெளிக்கொண்டுவரவேண்டியிருந்த தேவைகளும், சுயாதீன ஊடகராக என்னை ஓர்மத்துடன் இயங்கச் செய்தன என்று நினைக்கிறேன்.
போர்க்காலத்தில், சுயாதீன ஊடகராகச் செயற்பட்டிருக்கிறீர்கள். பல ஒளிப்படங்களை எடுத்தது மட்டுமல்லாமல், பல்வேறு தளங்களில் அவற்றை வெளிப்படுத்தியிருக்கிறீர்கள். அவை சார்ந்த அனுபவங்களைச் சுருக்கமாகப் பகிர்ந்துகொள்ள முடியுமா?
சிறீலங்கா அரசு, தமிழ் மக்கள் மீது ஏவிவிட்டிருந்த அராஜகங்களை, படுகொலைகளை ஒளிப்படங்களாக்கிய அனுபவங்களை, வார்த்தைகளால் சுருக்கமாக வெளிப்படுத்துவது மிகவும் சிரமமாகும். வாழ்விடங்களில் இருந்து துரத்தியடிக்கப்பட்ட மக்களின் துயர் மிகுந்த வாழ்வியலை, போர்க்குற்றங்களின் விளைவுகளை, 'கண்ணியம்' (dignity) சிதைக்கப்பட்ட நிலையில் இனப்படுகொலை நடவடிக்கைகளுக்கு உள்ளாக்கப்பட்ட மக்களின் அவலங்களை, ஒளிப்படங்களிலே தொடர்ச்சியாகப் பதிவுசெய்திருக்கிறேன்.
'சர்வதேசப் பொது நிறுவனங்கள்' வெளியேற்றப்பட்டிருந்த போர்க்காலத்தில், வெளியிலிருந்து வன்னிக்குள் எந்த ஊடகங்களும் அனுமதிக்கப்படாதிருந்த நிலையில், விடுதலைப் புலிகள் சார்ந்த சில ஊடகங்கள் மட்டுமே வன்னிக்குள் இயங்கிக்கொண்டிருந்தன. நெருக்கடிகள் பலவும் நிறைந்திருந்த அந்த இறுதி யுத்த காலத்தில், எனது ஒளிப்பட ஊடகவியல் சார் நடவடிக்கைகள் அனைத்துமே சுயாதீனமானவையாக இருந்தன. அக் காலத்தில், எந்த நிறுவனத்திடமிருந்தும் யாரிடமிருந்தும் சம்பளம் பெறும் ஊழியராக நான் இருக்கவில்லை. எந்தத் தரப்பாலும் யாராலும் நிறுத்தப்பட முடியாதிருந்த கோர யுத்தத்தின் அவலங்களைப் பதிவுசெய்து, வெளிக்கொண்டு வரவேண்டும் என்ற ஓர்மத்துடன் சுயாதீனமாகவும் தீவிரமாகவும் செயற்பட்டேன். யுத்தம் தீவிரமாக நடந்துகொண்டிருந்த போதே, பெருந்தொகையான ஒளிப்படங்களை 'வெளியில்' அனுப்பிக்கொண்டிருந்தேன். ஒளிப்படங்களைத் தெரிவுசெய்து 'வெளியில்' அனுப்பும் பணியில் எனக்கு உதவிய ஒரு மூத்த ஊடகர், என்னைப்போல் யுத்தத்திலிருந்து தப்பிப்பிழைத்து இப்போதும் வாழ்ந்துகொண்டிருக்கிறார். மிக நெருக்கடியான தருணங்களில், எனது ஊடகச் செயற்பாடுகள் சிலவற்றுக்கு உதவிய நண்பர்கள் சிலரை யுத்தம் விட்டுவைக்கவில்லை.
போர்க்காலத்தின் எல்லாத் துயரங்களையும் என் மக்களோடு சேர்ந்திருந்து அனுபவித்துக்கொண்டே, இடம்பெயர்ந்து அலைந்துகொண்டிருந்தேன். எனது தனிப்பட்ட இழப்புகள் ஏராளமானவை. எனது உறவினர்கள் மற்றும் நண்பர்கள் பலரை இழந்திருக்கிறேன். முக்கிய ஆவணங்கள், படைப்புகள், பல்லாயிரக் கணக்கிலான புத்தகங்கள், திரைப்படங்கள், நீண்டகாலமாக நான் எடுத்திருந்த ஒளிப்படங்களின் மூலப்பிரதிகள் உட்பட, எனது 'சொத்துகள்' பலவற்றையும் இழந்திருக்கிறேன்.
யுத்தகாலத்தில் பல்வேறு வகையான இழப்புகளையும் துயரங்களையும் சந்திக்காத மனிதர்களே இருந்திருக்க முடியாது. யுத்தத்தில் மனிதர்கள் மட்டும் பாதிக்கப்படுவதில்லை. மனிதர்கள் சார்ந்த அனைத்து ஜீவராசிகளும் இயற்கையும் நிலமும் சூழலும் யுத்தத்திலே பெரும் பாதிப்புகளுக்குள்ளாகும். அத்தகைய பாதிப்புகளை அருகிலேயே இருந்து பார்க்க நேர்ந்திருக்கிறது. நிர்க்கதியாக அலைக்கழிந்து, அவலங்களையெல்லாம் பதிவுசெய்ய நேர்ந்த அனுபவத்துயர்கள், என் ஆயுள் முழுமைக்கும் நீடிக்கக்கூடியவை.
போருக்குப் பின்னரான உங்களது பணிகள் பற்றிக் குறிப்பிட முடியுமா?
ஒளிப்படக் காட்சி நிகழ்வுகள் பலவற்றிலும் ஊடகங்கள் பலவற்றிலும் எனது போர்க்கால ஒளிப்படங்களை வெளிப்படுத்தியிருக்கிறேன். பல்வேறு நாடுகளில் ஒளிப்படக் காட்சி நிகழ்வுகள் நடந்திருக்கின்றன. இத்தகைய முயற்சிகளில் தொடர்ந்தும் ஈடுபடுகிறேன். இந்தியாவில் கோவா மற்றும் கேரளா போன்ற மாநிலங்களிலும் சுவிற்சர்லாந்து, இங்கிலாந்து, கனடா போன்ற நாடுகளிலும் எனது ஒளிப்படங்கள்
காட்சிப்படுத்தப்பட்டிருக்கின்றன. நெருக்கடிகள் தொடரும் வாழ்க்கைச் சூழலில் எழுத்து முயற்சிகள் குறைந்து போய்விட்டன. எனினும், எனது வலைத்தளத்திலும் முகநூலிலும் அவ்வப்போது எழுதி வருகிறேன். 2019 ஆம் ஆண்டின் மே மாதத்தில், இங்கிலாந்து நாட்டில் இரண்டு இடங்களில் எனது ஒளிப்படக் காட்சி நிகழ்வுகள் நடைபெறவுள்ளன. வேறு சில நாடுகளில் ஒளிப்படக் காட்சிகளை முன்னெடுப்பதற்கான முயற்சிகள் நடந்துவருகின்றன. எனது போர்க்கால ஒளிப்படங்களையும் அனுபவங்களையும் அடிப்படைகளாகக் கொண்டு, போருக்குப் பின்னரான எனது பணிகளின் காட்சிப் பதிவுகளையும் ஒருங்கிணைத்து, ஒரு விவரணத் திரைப்படத்தினை உருவாக்கிக்கொண்டிருக்கிறேன்.
சர்வதேச மட்டங்களில் இயங்குகின்ற ஊடகர்கள், மனித உரிமையாளர்கள் போன்றவர்களுடன் இணைந்து சில வேலைத்திட்டங்களில் ஈடுபடுகிறேன்.
ஐ நா அரங்கில் (பக்க அமர்வில்), எனது ஒளிப்படங்களைக் காட்சிப்படுத்தி உரையாற்றியிருக்கிறேன். ஐ நா நடவடிக்கைகளின் மீது ஓரளவு செல்வாக்குச் செலுத்தக் கூடியவர்களைச் சந்தித்து உரையாடி, எனது ஒளிப்படங்கள் பலவற்றை வழங்கியிருக்கிறேன். போர்க்குற்றங்கள் மற்றும் இனப்படுகொலை நடவடிக்கைகள் போன்றவற்றை வெளிக்கொணரும் வகையில் செயற்படுகிறேன்.
ஈழத்தமிழர்களுக்கு இழைக்கப்பட்ட அநீதிகளுக்கான பாரபட்சமற்ற சாட்சியாக இருக்க விழைகிறேன். இலங்கையில் போர்க்குற்றங்களுக்கும் இனப்படுகொலை நடவடிக்கைகளுக்கும் மிக நீண்ட கால வரலாறு இருக்கிறது. அவை, இறுதி யுத்தகாலத்தில் பாரிய அளவில் மேற்கொள்ளப்பட்டிருக்கின்றன.
எனது முக்கியமான பதிவுகள் பலவற்றை யுத்த காலத்திலேயே இழக்க நேர்ந்திருந்தாலும், பல்வேறு நெருக்கடிகளைக் கடந்து பல பதிவுகளைப் பாதுகாக்க முடிந்திருக்கிறது. அவற்றைத் தொடர்ச்சியாக வெளிக்கொண்டுவந்திருக்கிறேன். ஒளிப்பட ஊடகவியல் சார்ந்த எனது பயணத்தில், பேரனுபவங்களையும் பெருந்துயரங்களையும் கண்டடைய நேர்ந்திருக்கிறது. அவற்றையெல்லாம் இயன்றவரை பதிவுசெய்ய வேண்டும். முக்கியமாக, எனது ஒளிப்படங்களைத் தெரிவுசெய்து, நூல்களாக்கி வெளியிட வேண்டும். இன்னமும் வெளிவராத ஒளிப்படங்கள் பல என்னிடம் இருக்கின்றன.
போர்க்குற்றங்கள் மற்றும் இனப்படுகொலை சார்ந்த உங்கள் கருத்துகளைப் பகிர்ந்துகொள்ள முடியுமா?
இலங்கையின் உள்நாட்டு யுத்தகாலத்தில், போர்க்குற்றங்கள் ஏராளமாக நடந்திருக்கின்றன. அது மட்டுமல்ல, சிங்கள அரச தரப்பினரால், ஈழத்தமிழர்கள் மீது இனப்படுகொலை நடவடிக்கைகள் மேற்கொள்ளப்பட்டிருக்கின்றன. அவை, விரிவாக ஆராயப்பட வேண்டியவை. அவை பற்றிப் பல்வேறு தளங்களில், அவ்வப்போது எழுதியும் பேசியும் வந்திருக்கிறேன்.
இலங்கையில் நடைபெற்ற போர்க்குற்றங்கள் மற்றும் இனப்படுகொலைக் குற்றங்கள் சரியான முறையில் விசாரிக்கப்பட வேண்டியவை.
இனவெறியின் அடிப்படையில் திட்டமிட்ட முறையில், மேற்கொள்ளப்படுகின்ற கூட்டுப் படுகொலைகள் மாத்திரமல்ல, ஒரு இனத்தின் கண்ணியம் (dignity) சிதைக்கப்படுகிற வகையில் முன்னெடுக்கப்படுகின்ற திட்டமிட்ட அனைத்து நடவடிக்கைகளும் இனப்படுகொலை என்னும் பொறிமுறைக்குள் வரக்கூடியவை. இனப்படுகொலை (genocide) என்ற வார்த்தையை அறிமுகப்படுத்திய 'ரபேல் லெம்ப்கின்' என்பவரின் பதிவுகள், நுட்பமாகக் கவனிக்கப்படவேண்டியவை. வெறும் கொலைச்சம்பவங்களை அல்லது போர்க்குற்றங்களை மட்டும் முன்வைத்து, அவற்றை இனப்படுகொலை என்று வரையறுக்க முடியாது.
இப்போது இருக்கும் சர்வதேச சமூகங்களின் நம்பிக்கைகள் அல்லது சட்ட நியமங்களின்படி, இன அழிப்பு அல்லது இனப்படுகொலை (genocide) என்னும் பொறிமுறையின் உள்நோக்கம் (motivation) கண்டறியப்பட்டு நிரூபிக்கப்படவேண்டியது மிக மிக அவசியமாகும். அதைச் சாத்தியப்படுத்துவது சாதாரணமான விடயமல்ல. மிகவும் தெளிவான ஆதாரங்களுடன் கூட்டுப் பலத்துடன் எதிர்கொள்ளவேண்டிய பெரும் சவால் அது.
இலங்கையில், துல்லியமான ஆதாரங்களைக் கொண்டிருக்கிற போர்க்குற்றங்களே இன்னமும் சரியாக விசாரிக்கப்படாதிருக்கும் நிலையில், இனப்படுகொலை சார்ந்த விசாரணைகளை சாத்தியப்படுத்திவிடுவது எளிதாக இருக்காது.
கண்ணியமான வாழ்வியல் சிதைக்கப்பட்டு, கொடிய யுத்தத்தில் எல்லா வகையிலும் மிக மோசமாகப் பாதிக்கப்பட்ட ஈழத்தமிழினத்திற்கு, நியாயமான நிரந்தரத் தீர்வு அவசியமாகும்.
ஈழத்தமிழினத்திற்கான நிரந்தரத் தீர்வை நோக்கிய போராட்ட வழிமுறைகளுக்கான வலிமையான கருவிகளாக இருக்கக் கூடியவை, போர்க்குற்றங்கள் மற்றும் இனப்படுகொலைக் குற்றங்கள் சார்ந்த ஆதாரங்களே. அத்தகைய வலிமையான கருவிகளின் பலத்துடன், தமிழ் அரசியல்வாதிகள் மற்றும் தமிழ் தேசிய செயற்பாட்டாளர்கள் போன்றோர்
செயற்பட வேண்டும். அரசியல் தீர்வு சார்ந்த விவகாரங்களில்,
சட்ட ரீதியிலும் புலமைத்துவ ரீதியிலும் ராஜதந்திர ரீதியிலும் ஈழத்தமிழினம் வழங்கவேண்டிய 'கூட்டு உழைப்பு' அதிகமானதாகும்.
இலங்கையில் ஆயுதப் போர் நிறைவடைந்து பத்து ஆண்டுகளாகிவிட்டன. இராணுவத்தால் ஆக்கிரமிக்கப்பட்டிருந்த மக்களின் நிலங்கள் முழுமையாக விடுவிக்கப்படவில்லை. இலங்கை அரச தரப்பினரால் நீண்டகாலமாகத் தடுத்து வைக்கப்பட்டுள்ள தமிழ் அரசியல் கைதிகள் பலர் இன்னமும் விடுவிக்கப்படவில்லை. காணாமல் ஆக்கப்பட்டவர்கள் சார்ந்து, ஆக்கபூர்வமான விசாரணைகளோ கண்ணியமான பொறுப்புக்கூறல்களோ மேற்கொள்ளப்படவில்லை. அரச பயங்கரவாதக் குற்றங்களும் அதிகார துஸ்பிரயோகங்களும் நிகழக் காரணமாக இருக்கும் 'பயங்கரவாதத் தடைச் சட்டம்' நீக்கப்படவில்லை. ஆம், இலங்கையில் ஒரு சட்டமே இனரீதியிலான ஒடுக்குமுறைகளை நிகழ்த்தும் வகையில் வடிவமைக்கப்பட்டிருக்கிறது. சில திருத்தங்களுடன் அது தொடர்ந்தும் நடைமுறையில் இருக்கிறது. இலங்கையில், கட்டமைக்கப்பட்ட இன அழிப்பு இன்னமும் மேற்கொள்ளப்
படுவதாக நம்பப்படுகிறது.
ஒரு போராட்டக் களமாக, ராஜதந்திரக் களமாக ஐ நா பயன்படுத்தப்படலாமே ஒழிய, கொடிய போரிலும் இனப்படுகொலையிலும் பாதிக்கப்பட்ட தமிழர்களுக்கான கண்ணியமான நீதியை, ஐ நா வழியாக எதிர்பார்க்க முடியாது. பல்வேறு திசைகளில் தமிழர் தரப்பினரது முயற்சிகள் தொடரப்பட வேண்டும். இலங்கையின் பிரதான அரசியல் நீரோட்டத்திலும் சர்வதேச நாடுகளின் அரசியல் நீரோட்டங்களிலும் பெருஞ்சலனங்களை ஏற்படுத்தக்கூடிய வகையில், நீதிக்கான போராட்டங்கள் முன்னெடுக்கப்பட வேண்டும். 'சர்வதேச குற்றவியல் நீதிமன்றம்' நோக்கிய ஆக்கபூர்வமான முன்னெடுப்புகள் ஆரம்பிக்கப்பட வேண்டும். ஈழத்தமிழர் சார்ந்த பல்வேறு முன்னெடுப்புகளில் ஈடுபடுகிறவர்கள் முன், பாரிய கடமைகள் காத்திருக்கின்றன. அவற்றை நிறைவேற்றும் பக்குவமும் ஓர்மமும் அத்தகையவர்களுக்கு வாய்க்க வேண்டும். 'அவர் வருவார், இவர் வருவார்' என்று காத்திருக்காமல், ஈழத்தமிழர்கள் எல்லோரும் அவரவருக்கான 'பொறுப்பை' உணர்ந்து,
விழிப்புணர்வுடன் செயற்பட முன்வரவேண்டும்.
போர் என்பதே மனித குலத்துக்கு எதிரான பாரிய குற்றம் என்பதே போர் பற்றிய எனது பார்வையாகும். 'போர்' ஒன்று நிகழ்த்தப்படுகிறபோது, முன் நிபந்தனை இன்றியே 'போர்க்குற்றங்கள்' நிகழ்ந்துவிடக் கூடியவை. வலிந்து திணிக்கப்படுகிற போரை எதிர்கொள்ளும் நிலையில் இருக்கும் போராட்டமும் போரும் ஒன்றல்ல என்பது இங்கு கவனிக்கப்பட வேண்டியதாகும். ஆனால், ஒரு போராட்டத்தில் போருக்குரிய நாசகாரப் பண்புகள் தலையெடுக்கக் கூடும். ஆக, போராட்டத்திலும் போர்க்குற்றங்கள் நிகழ வாய்ப்பிருக்கிறது. போரை எதிர்ப்பது போராட்டத்தை எதிர்ப்பதாகாது. ஒரு போராட்டத்தில் தலையெடுக்கக்கூடிய போருக்குரிய நாசகாரப் பண்புகளை எதிர்ப்பதுவும் போராட்டத்தை எதிர்ப்பதாகாது. இது நீளமாக விவாதிக்கப்படவேண்டிய விடயமாகும்.
சுயாதீன ஊடகராக, கலைஞராக உங்கள் ஒளிப்படங்களுடன்
தொடர்ந்து பயணித்துக்கொண்டிருக்கிறீர்கள்.
இலகுவானதாகவோ திருப்திகரமானதாகவோ இந்தப் பயணம் அமைந்திருக்கிறதா?
போர்க்கால ஒளிப்படங்களுடன் பயணித்துக்கொண்டிருப்பது, எந்த வகையிலும் இலகுவானதாக இருப்பதில்லை. இதனால், எனக்குத் தனிப்பட்ட முறையில் நன்மைகளோ மகிழ்ச்சியோ ஏற்படுவதில்லை. மாறாக, மன உளைச்சல்களும் பலவாறான நெருக்கடிகளும் வந்து வாய்த்துவிடுகின்றன. சிலதை இழந்து தான், சிலதை 'அடைய' வேண்டியிருக்கிறது.
அவலங்களைப் படங்களாகப் பதிவுசெய்த நினைவுகள், மீள மீள மேற்கிளம்பிப் பாரிய மன உளைச்சல்களை ஏற்படுத்தக் கூடியவை. துயர் செறிந்த அனுபவங்களையும் காட்சிப்பதிவுகளையும் காவிக்கொண்டு தொடர்ந்தும் பயணிக்கவேண்டியிருப்பது, சமகாலத்தின் தவிர்க்க முடியாத தேவையாக நினைக்கிறேன். நான் பதிவாக்கிய அவலங்களை, வெவ்வேறு தேவைகள் சார்ந்து நானே திரும்பத்திரும்பக் கையாள நேர்ந்துகொண்டிருக்கிறது. இந்தச் செயல் முறையானது,
உள நெருக்கீட்டில் என்னை மீள மீளத் தள்ளிவிட்டுக்கொண்டிருக்கிறது. எது எப்படியிருந்தாலும், இயன்றவரை என்னை ஒழுங்குபடுத்திக்கொண்டு பயணிக்கிறேன்.புலம்பெயர்ந்து வாழும் எனக்குப் பல்வேறு தேவைகள், தனிப்பட்ட விருப்பங்கள் போன்றவை இல்லாமலில்லை. அவற்றை, என்னால் திருப்திகரமாக நிறைவேற்றிக்கொள்ள முடிவதில்லை.
ஆரம்பத்தில், சில காரணங்களுக்காக எனது பெயர் குறிப்பிடாமலேயே எனது போர்க்கால ஒளிப்படங்களை வெளியிட்டு வந்தேன். பின்னர், சில புனைபெயர்களைப் பயன்படுத்தியிருக்கிறேன். பல நெருக்கடிகளைத் தொடர்ந்து, நான் புலம்பெயர நேர்ந்தது. பின்னர், சர்வதேச அரசியல் சார் மட்டங்களில், ஐ நா போன்ற தளங்களில், மனித உரிமைகள் சார்ந்த முன்னெடுப்புகளில், போர்க்குற்றங்கள் மற்றும் தமிழர்கள் மீதான இனப்படுகொலை நடவடிக்கைகளை ஆதாரபூர்வமாக எடுத்துரைக்க வேண்டியிருக்கும் சந்தர்ப்பங்களில் எனது பெயரை முன்வைக்கவேண்டிய அவசியம் ஏற்பட்டது.
இப்போது, ஒளிப்படக் காட்சி நிகழ்வுகள் மற்றும் ஊடகங்கள் வாயிலாக, எனது ஒளிப்படங்களை எனது பெயருடன் வெளியிட்டு வருகிறேன். இடையிலே சிலர், பொதுவெளியில் 'அநாமதேயமாக' உலவிய எனது ஒளிப்படங்களைத் திருடி எடுத்துத் தங்களுடையதாக உரிமைகோரியிருக்கிறார்கள் என்பது வேறு கதை. மோசமான உள் நோக்கங்களுடன் நாசகார நடவடிக்கைகளை மேற்கொள்ளக் கூடியவர்கள், எங்கும் இருப்பார்கள். என் பெயரோடு நான் வெளியிடும் அத்தனை படங்களும் என்னுடையவை என்பதைத் துல்லியமாக உறுதிப்படுத்தக் கூடிய எல்லா வகையான ஆதாரங்களும் என்னிடம் இருக்கின்றன. அதனால், என்னசெய்யவேண்டுமென்று நான் நினைக்கிறேனோ அதை உறுதியோடு செய்துகொண்டிருக்கிறேன்.
ஒளிப்பட ஊடகவியல் சார் நோக்கில், எனது போர்க்கால ஒளிப்படங்கள் பலவும் குற்றங்களை ஆதாரபூர்வமாக இனங்காட்டக் கூடியவை. ஆக, குற்றங்களுக்குக் காரணமாக இருந்தவர்கள், குற்றங்களை நிகழ்த்தியவர்கள், குற்றங்களுக்குத் துணைபோனவர்கள் என்று எனக்கு எதிராக ஒரு நீண்ட வரிசை உருவாக வாய்ப்பிருக்கிறது. அநீதி இழைக்கப்பட்ட, பாதிக்கப்பட்ட தரப்பினைச் சார்ந்தவனாக இருந்துகொண்டு நீதிக்காகக் குரல் கொடுக்கிறேன். மோசமான அதிகார மையங்களுக்கும், அமைப்பு ரீதியான மக்கள் விரோத வன்முறை நடவடிக்கைகளுக்கும் எதிரானவனாக இருக்க விழைகிறேன். இதனால், உலகின் எந்த மூலையில் இருந்தாலும் பலவாறான நெருக்கடிகளை நான் எதிர்கொள்ள வேண்டியிருக்கும்.
போர்க்கால ஒளிப்படங்களுடனான எனது பயணத்தை, ஈழத்தமிழினத்தின் நலன் சார்ந்த பொதுப் பணியாகவே கருதுகிறேன். இதுவும் ஒருவகையான 'போராட்டம்' தான். என்னளவில் பெருமைக்குரியதான, அர்ப்பணிப்புகள் நிறைந்த ஒரு வாழ்க்கை முறையினைத் தொடர்ந்து வந்திருக்கிறேன். வியர்வையும் குருதியும் கண்ணீரும் சிந்திய என் கடந்த காலப் பயணத்தைப் பற்றி விரிவாகப் பேசவேண்டிய அவசியம் இப்போது இல்லையென்று கருதுகிறேன். சுயசிந்தனையுடன் கூடிய சுயாதீன நிலைப்பாடுகளுடன் என் பயணத்தைத் தொடர்கிறேன். விடுதலை அரசியலில் நான் தொடர்ந்து ஈடுபட்டுக்கொண்டிருப்பதாக நினைக்கிறேன். தேவைகள் பொறுத்து, ஈழத்தமிழர் நலன்களில் அக்கறை கொண்ட நண்பர்களின் ஒத்துழைப்பைப் பெற முடிந்திருக்கிறது. யாருடைய நிழல்களிலும் நான் ஒதுங்கிக்கொள்வதில்லை. எத்தகைய நீரோட்டங்களிலும் கரைந்துபோய்விடுவதில்லை. ஒரு ஊடகராகவும் இருக்கும் என்னால், மாற்றுக்கருத்தாளர்கள் மத்தியிலும் கூட, ஊடகரீதியான தேவைகளின் அடிப்படையிலே ஊடாட்டம் கொள்ள முடியும்.
சுயாதீன ஊடகராக நான் பயணிக்க நேர்ந்த இறுதி யுத்த காலத்தில், அதிர்ச்சிகரமான, கசப்பான பல அனுபவங்கள் வாய்த்திருக்கின்றன. துயரங்களோடு காமெராக்களையும் காவிக்கொண்டு ஒரு பெரும் சாகசப் பயணத்தை மேற்கொண்டிருந்தேன் என்பது அதீதமான கூற்றல்ல. யுத்த காலத்தில், என்ன செய்கிறேன் என்பதையும் என்ன செய்யவேண்டுமென்பதையும் நன்கு உணர்ந்திருந்தேன். எப்போதும் எனக்குத் 'தாழ்வுச்சிக்கல்' இருந்ததில்லை. என்னை நானே 'மதிப்பீடு' செய்துகொள்ளத் தயங்குவதில்லை. சாகசங்களால், பேரனுபவங்களால், துயரங்களால் எனது வாழ்வின் பெரும்பகுதி நிறைந்திருக்கிறது.
நெருக்கடிகளும் ஆபத்துகளும் நிறைந்த யுத்த சூழ்நிலைகளில், ஆவணத்தன்மைகள் கொண்ட தரமான ஒளிப்படங்களை எப்படி உங்களால் எடுக்க முடிந்தது?
போர்க்காலத்தில், எப்போதும் என் கையிலோ அருகிலோ கமெராவை வைத்திருப்பேன். எனது மூன்றாவது கண், எனது கமெராவாகும். மிக மோசமான போர்ச் சூழலில், தொழில் நுட்ப வசதிகள் குறைவாயிருந்த காமெராக்களையும் கமெரா உபகரணங்களையும் கொண்டு, விரைவாகவும் தரமாகவும் ஒளிப்படங்களைப் பதிவுசெய்யக் கடும் பிரயத்தனங்களை மேற்கொள்ள வேண்டியிருந்தது. என்னுடைய சில கமெரா உபகரணங்கள் எறிகணைத் தாக்குதல்களில் சேதமடைந்திருக்கின்றன.
பிலிம் காமெராக்களோடு எனக்கிருந்த பரிச்சயம், எத்தகைய கமெராக்களிலும் ஒளிப்படங்களை எடுக்கக்கூடிய வல்லமையினை எனக்கு வழங்கியிருந்தது என்று கருதுகிறேன். பல்வேறு ஒளி நிலைகளிலும் சவால்கள் நிறைந்த சூழ்நிலைகளிலும் காமெராக்களை வேகமாகச் செயற்படுத்தும்போது வரக்கூடிய பிரச்சினைகளைத் தவிர்க்க, அனுபவபூர்வமாக நான் அறிந்திருந்த தந்திரங்களை மேற்கொள்வேன்.
ஒளிப்படக் கலை சார்ந்த எனது சுய தேடல்கள் மற்றும் ஊடகவியல் சார் அனுபவங்கள் போன்ற காரணிகள், யுத்தகால ஒளிப்படங்களை நேர்த்தியாகப் பதிவுசெய்ய எனக்கு உதவியிருக்கின்றன என்று நினைக்கிறேன்.
ஒளிப்பட ஊடகவியல் சார் பயிற்சிப் பட்டறைகளில் நான் அடிக்கடி வலியுறுத்துகின்ற இரண்டு விடயங்கள், ஒளிப்பட ஊடகவியலைப் பொறுத்தவரையில் மிகவும் முக்கியமானவை. ஒன்று, செய்தி மதிப்பு (News value). இன்னொன்று, தொழில்நுட்பத் தரம் (Technical quality). மிக முக்கியமாகக் கவனிக்கப்படவேண்டிய இவற்றினுள்ளே, ஒளிப்படக் கலையின் அடிப்படையானதும் முக்கியமானதுமான அம்சங்கள் பலவற்றையும் அடங்கிவிட முடியும். இவை, ஒன்றோடு ஒன்று பின்னிப் பிணைந்தவை. எனினும், தேவை கருதிப் பகுப்பாய்வு செய்து பார்க்கப்படக் கூடியவை.
டிஜிரல் கமெராக்களின் வருகைக்குப் பின்னர், தமிழ்ச் சூழலில் பலரும் டிஜிரல் குப்பைகளையே உற்பத்தி செய்துகொண்டிருக்கிறார்கள். காட்சிகளைத் துஸ்பிரயோகம் செய்யும் போக்கு அதிகரித்து வருகிறது. ஒளிப்படங்களைப் பொறுத்த வரையில் கணங்கள், காலங்கள் மிக முக்கியமானவை. கணங்கள் மாறிக்கொண்டேயிருக்க, காட்சிகளும் மாறிக்கொண்டேயிருக்கும். ஒரு நல்ல ஒளிப்படமானது, உரிய கணத்தில் சரியான முறையில் பதிவுசெய்யப்பட வேண்டியது. ஒரு சிறந்த கணத்தை அடைய, நீண்ட நேரக் காத்திருப்போ அதிவேக இயக்கமோ அவசியப்படக் கூடும். கடந்த காலம் திரும்ப வராது. ஒரு படத்தைத் தவறாக எடுத்துவிட்டதாக உணர்ந்தால், திரும்பவும் அதே படத்தை அதே கணத்தில் எடுத்துவிடவே முடியாது. கமெராவில், அடுத்தடுத்தோ அழித்தழித்தோ பதிவுசெய்யும் வசதிகள் இருந்தாலும், கடந்த காலத்தை மீளப் பதிவுசெய்யவே முடியாது.
தர நிர்ணயங்களுக்கு அப்பால், அவசரகதியில் மேற்கொள்ளப்பட்ட ஒரு சாதாரணப் பதிவு கூட, ஆவண முக்கியத்துவம் பெற்றுவிடக் கூடும். (சாதாரண கைத்தொலைபேசிக் காமெராக்களினால் பதிவுசெய்யப்பட்ட படங்களுக்கும் முக்கியத்துவம் கிடைக்கும்.) நிலையற்ற காலம் பற்றிய பிரக்ஞையுடனும் ஒளிப்பட ஊடகவியல் சார் நோக்கு நிலையுடனும் ஒவ்வொரு படங்களையும் பொறுப்புணர்வுடன் எடுக்க முயற்சிக்க வேண்டும். ஒரு கணத்தில் எடுக்கப்பட்ட படமானது, நிலையற்ற காலத்தைப் பதிவு செய்திருப்பதாகும். இறுதி யுத்தம் தீவிரமடைவதற்கு முன்னர், கிளிநொச்சியில் வெளியிட்ட எனது ஒளிப்பட நூலுக்கு, 'வாழும் கணங்கள்' என்று பெயர் வைத்திருந்தேன். அப்போது நிகழ்த்தப்பட்ட எனது ஒளிப்படக் காட்சியின் பெயரும் அதுதான்.
சமகால ஈழத்தமிழ் தேசியம் சார் நடவடிக்கைகள் எப்படியிருக்கின்றன?
ஈழத்தமிழ் தேசியம் சார் முன்னெடுப்புகள் ஈழத்திலும் புலம்பெயர் தமிழ்ச் சூழல்களிலும் தமிழகத்திலும் ஆரோக்கியமான நிலையில் இருப்பதாக நான் நினைக்கவில்லை. (தமிழக தமிழ் தேசியம் வேறு வகையானது. அதுவும் ஆரோக்கியமான நிலையில் இல்லை.) வெறுப்பரசியல் சார் வெளிப்பாடுகளும் அடிப்படைவாத நிலைப்பாடுகளும் தமிழ் தேசியவாத நடத்தைகளின் பகுதிகளாகப் பெரும்பாலோரால் புரிந்துகொள்ளப்படுகின்றன. தமிழ்த் தேசிய அரசியல் செல்நெறியில் கண்மூடித்தனமான நம்பிக்கைகளும் துதிபாடல்களும் அடிப்படைவாதப் பண்புகளும் வழக்கமாகியிருக்கின்றன. ஈழத்தமிழரின் 'பலம்', சர்வதேச அளவில் சிதறுண்ட நிலையிலேயே இன்னமும் காணப்படுகிறது.
உலகெங்கும் பரந்து வாழும் தமிழினத்தின் பலத்தைக் கூட்டி வளர்த்தெடுக்கும் நோக்கில், தேவைகள் மற்றும் உண்மைகள் சார்ந்த உரையாடல்களை முன்னெடுக்கும் வகையில் தமிழ் தேசிய நடவடிக்கைகள் அமைந்திருக்க வேண்டும். தமிழ் தேசியத்தில் சனநாயக உள்ளடக்கம் அவசியமானது.
தமிழ் தேசியம் எனப்படுவது, தமிழினத்தின் பாதுகாப்புக் கவசமாகும். கண்ணியமும் பாதுகாப்பும் கொண்ட கூட்டுப்பலம் மிக்க வாழ்விற்கான உத்தரவாதத்தை, அதன் தளத்திலிருந்தே கோர முடியும். விடுதலை அரசியல் சார் முன்னெடுப்புகளை ஒருங்கிணைக்கவும் வழிப்படுத்தவும் உதவும் தத்துவார்த்த இயக்கமாக, தமிழ் தேசியம் அமைந்திருக்க வேண்டும். தமிழ் தேசியமானது, ஆயுதப் போராட்ட இயக்கங்கள் மற்றும் அரசியல் கட்சிகள் போன்றவற்றின் ஏகபோக உரிமையாகவோ பிழைப்புவாதக் கோசமாகவோ 'பார்க்கப்படுவது' ஆபத்தானது.
தேசியவாதம் எனப்படுவது, ஒரு இனத்தின் அடிப்படையான உரிமைகள் மற்றும் தேவைகள் சார்ந்து கட்டமைவதோடு, சனநாயகப் பண்புகளின் அடிப்படைகளில் இருந்து முன் நகர்வதாக இருக்க வேண்டும். அத்தகைய முன் நகர்வே, முற்போக்குத் தேசியமாக இருக்க முடியும்.
சமகாலத் தமிழ் ஊடகச் செயற்பாடுகள் எப்படியிருக்கின்றன?
அச்சு ஊடகங்களின் வீச்செல்லையைத் தாண்டி, இலத்திரனியல் ஊடகங்களின் வீச்செல்லை விரிவடைந்திருக்கிறது. ஆனால், தமிழ்ச் சூழலில் ஊடகங்கள் பலவற்றினதும் இயங்குநிலை, பெருமளவிற்கு ஆரோக்கியமானதாக இல்லை. ஊடகவியலைக் கொச்சைப்படுத்துகிறவையாகவும் அடிப்படைவாதப் பண்புகள் நிறைந்தவையாகவும் உண்மைகளைத் துஸ்பிரயோகம் செய்கிறவையாகவும் பல இணைய தளங்கள் காட்சியளிக்கின்றன. ஊடகவியலானது, சனநாயகத்தின் நான்காவது தூண் என்று நம்பப்படுவது நடைமுறை உண்மையாக வேண்டும். ஒரு நாட்டையோ இனத்தையோ வழிப்படுத்தக்கூடிய சனநாயகத்தின் ஏனைய மூன்று தூண்களையும், நெறிப்படுத்தக்கூடிய வல்லமையும் பொறுப்புணர்வும் ஊடகங்களுக்கு இருக்க வேண்டும்.
துல்லியமானதும் பாரபட்சமற்றதுமான தகவல்களை வழங்குவது, சமூக அறிவு மட்டத்தை விருத்தி செய்யும் வகையிலான கற்பித்தல் செயற்பாடுகளைத் தொடர்வது, சமூக ஆரோக்கியத்துடன் கூடிய மகிழ்ச்சிப்படுத்தல் செயற்பாடுகளை முன்னெடுப்பது போன்ற மிக அடிப்படையான, முக்கியமான நோக்கங்கள் ஊடகங்களுக்கு இருக்க வேண்டும்.
போர்கள், விடுதலைப் போராட்டங்கள், விடுதலை இயக்கங்கள், விடுதலையின் பெயராலான தியாக மரணங்கள் போன்றவை சார்ந்த, துல்லியமானதும் பாரபட்சமற்றதுமான பதிவுகளே, ஈழத்தமிழினத்திற்கு எப்போதும் பயன்படக்கூடியவை. உண்மைகள் சார்ந்த உரையாடல்கள், ஆரோக்கியமான முன் நகர்விற்கு அவசியமானவை. உண்மைகள் கசப்பானவையாக அல்லது விரும்பத்தகாதவையாக இருந்தாலும் அதில் இருக்கக்கூடிய படிப்பினைகள் அவசியமானவை. தொழில் நுட்ப அறிவியல் நன்மைகளை உள்வாங்கி வளர்ச்சிப் பாதையிலே பயணிக்கக்கூடிய ஊடக உலகம், மிகவும் அடிப்படைத் தேவையாக இருக்கக் கூடிய ஊடக அறநெறிகளையும் கூடவே எடுத்துசெல்ல வேண்டும். புலனாய்வு ஊடகவியல், தமிழ்ச் சூழலில் ஆரோக்கியமான திசையில் வளர்த்தெடுக்கப்பட வேண்டும்.
சமூக உறவுநிலைகளிலும் ஊடக உலகிலும் சமூக வலைத்தளங்கள் சாதகமான தாக்கங்களை, மாற்றங்களை ஏற்படுத்தியிருக்கின்றன. குறுங்குழுவாதம், இன அடிப்படைவாதம், மத அடிப்படைவாதம், வெறுப்பரசியல், போலிச் செய்திகள், வதந்திகள் போன்றவற்றைத் தமிழ்ச் சுழலில் விதைப்பதற்கான களங்களாகவும் சமூக வலைத்தளங்கள் பிரயோகிக்கப்படுகின்றன.
பெரும்பாலும், சமூக வலைத்தளங்கள் வழியாகவே 'போலிச் செய்திகள்' பரப்பப்படுகின்றன. அவை பற்றிய விழிப்புணர்வு மக்கள் மத்தியில் உருவாக வேண்டும். ஊடக அறங்கள், சமூக வலைத்தளங்களுக்கும் உரியவை தான். ஊடகத்துறைகளில் ஏற்படக்கூடிய புதிய மாற்றங்களை, வளர்ச்சிகளை உள்வாங்கிக்கொள்ள வேண்டியிருக்கிறது. அதே நேரம், 'ஊடக அறங்கள்' குறித்த உறுதிப்பாட்டைக் கொண்டிருக்க வேண்டியுமிருக்கிறது. நிகழ்காலத்தில் கண்மூடித்தனமாகப் பகிரப்படுகிற ஒரு போலிச் செய்தி, எக்காலத்திலும் பல்வேறு 'குழப்பங்களை' நிகழ்த்திவிடக் கூடும். எது எப்படியிருந்தாலும், ஊடகங்களை எதிர்கொள்வதற்கான 'பக்குவம்' எல்லோருக்கும் வாய்க்க வேண்டும்.
போலிச் செய்திகளின் பெருக்கத்திற்கான முக்கிய உந்துசக்திகளில் ஒன்றாக தேசிய அடிப்படைவாதம் அமைந்திருக்கிறது. மத அடிப்படைவாதம், இன அடிப்படைவாதம் போன்றவற்றின் பெயராலும் போலிச் செய்திகள் பரவுவதை அவதானிக்க முடியும். போலிச் செய்திகள் என்னும் பரப்பிற்குள் 'வதந்திகள்' உள்ளடங்கக் கூடியவை. உண்மைத் தன்மையை அறிய முற்படாமல், தேசிய அடிப்படைவாதம் சார்ந்த போலிச் செய்திகளைப் பரப்புகிற செயலைத் தேசியக் கடமையாகப் பலர் நினைக்கிறார்கள். இதற்குள் தொழிற்படுகிற உளவியல் விரிவாக ஆராயப்படவேண்டியது. எல்லோருக்கும் எல்லாமும் தெரியட்டும் என்ற ஒருவகை சனநாயக உணர்வும் போலிச் செய்திகளின் பரவலாக்கத்துக்குக் காரணமாகிறது.
வெளிப்படையாக இயங்கும் ஊடக நிறுவனங்களின் செய்திகளைச் சரிபார்க்க வேண்டும் என்ற நல்லெண்ணம் மக்கள் மத்தியில் இருந்தாலும் கூட, தனிப்பட்ட வலைப்பின்னல்களில் போலிச் செய்திகள் பரவலாக்கப்பட்டு விடுகின்றன. முகநூல், ருவிட்டர், வட்சப், வைபர் போன்ற சமூக வலைத்தளங்கள் இத்தகைய விபரீதமான பரவலாக்கத்தில் முக்கிய பங்கு வகிக்கின்றன.
இந்தியா, கென்யா, நைஜீரியா போன்ற நாடுகளில், போலிச் செய்திகள் பற்றிய ஆய்வுகள் மேற்கொள்ளப்பட்டிருக்கின்றன. ஊடகவியலில் ஆர்வமுள்ளவர்கள், அத்தகைய ஆய்வுகளைத் தேடிப்படித்துப் பல்வேறு விடயங்களையும் அறிந்துகொள்ள முன்வர வேண்டும்.
கனடா வில் இருந்து வெளியாகும் 'தாய்வீடு' பத்திரிகையின் வடிவமைப்பாளராகவும் ஆலோசகராகவும் இருந்த, மறைந்த ஓவியர் கருணா அவர்களால், 2019 பெப்ரவரி மாதத்தில் மேற்கொள்ளப்பட்ட நேர்காணல்.
நன்றி - 'தாய்வீடு', மே 2019
பல்துறைக் கலைஞர் கருணா வின்சென்ற் அவர்கள், 2019 பெப்ரவரி மாதத்தில் என்னுடன் உரையாடி இந்த நேர்காணலைப் பதிவுசெய்திருந்தார். 'தாய்வீடு' பத்திரிகையின் மே மாத சிறப்பிதழில், எனது இறுதிப் போர்க்கால ஒளிப்படங்களுடன் இந்த நேர்காணல் பிரசுரமாகவேண்டும் என்று விரும்பியிருந்தார். இது பிரசுரமாவதற்கு முன்னர், அவரை இழக்க நேர்ந்துவிட்டது. தமிழ்ச் சூழலில் அது ஒரு பேரிழப்பு. இனிய நண்பர் கருணாவை எப்போதும் நன்றியுடன் நினைவுகூர்வேன். அவரது மறைவின் பின்னர், அவரது விருப்பத்தை நிறைவேற்ற முன்வந்த நண்பர்களுக்கு நன்றி. இந்த நேர்காணலில் உள்ளடக்கப்படாத பல கேள்விகளும் முழுமையாகப் பதிவுசெய்யப்படாத பதில்களும் வேறாக உள்ளன. அவை, பெரும்பாலும் ஒளிப்படங்கள், ஓவியங்கள், திரைப்படங்கள் பற்றியவை.
-அமரதாஸ்
