இங்கிலாந்தில் ஒளிப்படக்காட்சிகள்

Photograph © Amarathaas - In Sri Lankan civil war. (last war)

2019 மே மாதம் 07 ஆம் திகதி தொடக்கம் 17 ஆம் திகதி வரை, இங்கிலாந்து நாட்டின் SOAS பல்கலைக்கழகத்தில் WAR ON CIVILIANS என்ற மகுடத்தில் நிகழ்த்தப்பட்ட ஒளிப்படக்காட்சியில் எனது போர்க்கால ஒளிப்படங்கள் பல காட்சிப்படுத்தப்பட்டிருந்தன. சிறீலங்கா இராணுவத்தினரும் பெயர் குறிப்பிட முடியாத வேறு சிலரும் பதிவுசெய்திருந்த படங்களும் உள்ளடக்கப்பட்டிருந்தன. பாரிய அனர்த்தங்களுடன் 'இறுதிப்போர்' முடிவிற்குவந்து பத்து வருடங்கள் கடந்திருக்கும் நிலையில், சர்வதேச சமூகங்களின் மத்தியில் போர்க்குற்றங்கள் குறித்த கவன ஈர்ப்பை ஏற்படுத்தும் வகையில், சுயாதீன ஊடகரான பிரான்சிஸ் ஹாரிசன் மற்றும் மனித உரிமையாளரான யாஸ்மின் சூக்கா போன்றவர்களால் ITJP அமைப்பின் சார்பில் முன்னெடுக்கப்பட்டிருந்த நிகழ்வின் பிரதான அம்சமாகவே ஒளிப்படக்காட்சி அமைந்திருந்தது. நிகழ்வில் கலந்துகொள்ள நான் இங்கிலாந்துக்கு அழைக்கப்பட்டிருந்தும், சில காரணங்களால் செல்லமுடியாமல் ஆகிவிட்டது.   

SOAS பல்கலைக்கழகத்தில் காட்சிப்படுத்தப்பட்டிருந்த படங்கள், TIC அமைப்பினரால் மே மாதத்தின் 18 மற்றும் 19 ஆம் திகதிகளில் முன்னெடுக்கப்பட்டிருந்த TAMILS OF LANKA - A TIMELESS HERITAGE EXHIBITION நிகழ்விலும் காட்சிப்படுத்தப்பட்டிருந்தன. TIC இயக்குநராக இருந்த  மறைந்த திரு. வரதகுமார் விரும்பியிருந்தபடி, நானும் அவரும் திட்டமிட்டிருந்தபடி, பெரிய அளவிலான எனது ஒளிப்படக்காட்சியைச் சில காரணங்களால் நிகழ்த்தமுடியவில்லை. 

ஏற்கெனவே, திரு. கிருஸ்ணராஜாவின் முயற்சியில் 'விம்பம்' அமைப்பின் நிகழ்வென்றில் 2018 ஆம் ஆண்டில் எனது ஒளிப்படங்கள் காட்சிப்படுத்தப்பட்டிருக்கின்றன. அவை, பின் போர்க்கால ஒளிப்படங்களாகும். (போர் முடிந்த பின்னர், போர் நடந்த இடங்களில் எடுக்கப்பட்டவை.)   

இங்கிலாந்தில் நடைபெற்ற ஒளிப்படக்காட்சியில் கலந்துகொள்ளத் திட்டமிட்ட பயணத்திற்கான விசா விற்கு, தாமதமாக விண்ணப்பிக்க நேர்ந்தது. உரியகாலத்தில் விசா கிடைக்காமல் தாமதமாகவே கிடைத்தது. அது காலாவதியாவதற்குள் இங்கிலாந்துக்குப் பயணிக்க நினைத்திருக்கிறேன். இன்னொரு ஒளிப்படக்காட்சியையோ ஒளிப்படங்களின் திரையிடலையோ அங்கு நேரில் நின்று நிகழ்த்தும் விருப்பம் இருக்கிறது. இங்கிலாந்தில் இருக்கும் நண்பர்கள் உதவினால், அங்கு இன்னொரு ஆக்கபூர்வமான ஒளிப்படக்காட்சியை நிகழ்த்த முடியும். இங்கிலாந்தில் எனது ஒளிப்படங்களைக் காட்சிப்படுத்தி உதவிய அனைவருக்கும் நன்றிகள். 

அமரதாஸ் 
2019-05-29